میں تھر کا بیٹا ۔۔۔

میں تھر کا بیٹا ۔۔۔

سرد رات ۔۔۔ ٹھنڈی ٹھنڈی سرسراتی ہوائیں ۔۔ جو کانوں کی لو کو جما رہی تھیں ۔۔۔ ہاتھ برف ہوئےے جا رہے تھے ۔۔۔۔۔ ناک اور آنکھیں ۔۔۔ اپنے وجود پر مسکرارہی تھیں ۔۔۔ جو گالوں کو اپنے ہونے کا احساس دلا نے پر مصر تھے ۔۔۔۔ گردن اکڑتی جا رہی تھی ۔۔۔ پیر منجمد تھے ۔۔۔ میرے سینے میں کچھ دھڑک سا رہا تھا ۔۔۔ اور میرا پیٹ ؟ ۔۔۔ وہ تو مجھ سے روٹھا ہوا تھا ۔۔۔ کتنے دن ہوئے ۔۔۔ وہ مجھ سے لڑ رہا تھا ۔۔۔ اور میں ٹھٹھر رہا تھا ۔۔۔ بلک رہا تھا ۔۔ لیکن چہرہ فق تھا ۔۔۔ سپاٹ تھا ۔۔۔ امی بتا رہی تھیں ۔۔۔ کہ میرے بہت سارے بھائی بہنوں کو ۔۔۔ایک اسکول میں کچھ درندوں نے شہید کرڈالا تھا ۔۔ جنہیں طالبان کہتے ہیں ۔۔ بہت برے تھے وہ لوگ ۔۔ 
آج صبح میری چھوٹی بہن نے ایڑیاں رگڑ رگڑ کر ۔۔ مری امی کی گود میں جان دے دی تھی ۔۔ میری ماں کتنی روئی ۔۔ لیکن اس کے چہرے پر ایک قطرہ آنسو کا نہیں تھا ۔۔۔ وہ تڑپ رہی تھی ۔۔ بلک رہی تھی ۔۔۔ میرا سر بھی اس کی گود میں رکھا ہے ۔۔۔ اس کی آہ و فغاں میرے کانوں کی لو کو گرما رہی ہے ۔۔۔ ٹھنڈ کچھ کم ہوتی محسوس ہو رہی ہے ۔۔۔۔ لیکن اب وہ میری صورت پھر کبھی نہیں دیکھ سکے گی ۔۔۔ میں تو منوں مٹی تلے چلا جاوں گا ۔۔۔ کیا مجھے بھی شہادت کا رتبہ ملے گا ؟ ۔۔ شاید کچھ دنوں بعد امی بھی مجھ سے آن ملے ۔۔۔۔۔ ہم ماں بیٹے بیٹی ۔۔ دائمی دنیا میں بغلگیر ہونگے ۔۔۔ اور کہیں ذکر تک نہ ہوگا ۔۔ 
کیونکہ میری جان کسی طالبان نے نہیں لی ۔۔۔

شہیر